Kor høg IQ har du?
Då eg for lenge sidan gjekk på folkeskulen var rekning det faget som var den store prøvesteinen på om du var skuleflink. Når eg så bar eit gjensidig hat til rekning, hamla eg sjølvsagt ikkje opp med dei beste der.
I dag reknar ein med at IQ kan målast på fleire måtar, heldigvis. Ein katalogiserer minst åtte forskjellige slag evner, og eg skal nemna dei:
Den fyrste er den matematiske evne.
Så den musikalske i forskjellig form.
Så den kunstnarlege. Her er variantane mange.
Så den kroppslege. Det vil seie å vera dyktig i idrett og sport.
Så har vi evne til sjølverkjenning. Altså evne til å forstå seg sjølv. Kven ein er.
Nokre er og veldig flinke til å stella med dyr. Det er ikkje alle som kan det.
Så nemner eg dei med det usedvanlege gode handalag i praktisk arbeid.
Den siste evnen eg vil nemna, tykkjer eg er veldig viktig. Det er evne til empati. Altså innleving og medkjensle med andre.
Dersom denne evnen er totalt borte hjå eit menneske, kan vi stå overfor ein psykopat.
Ein kan vera eit matematisk flogvet, men vera kald og likesæl overfor andre menneske.
Ein kan verta verdsmeister i idrett, men mangla totalt sjølvinnsikt og vera ein superegoist.
Kor vil du ha din høgste IQ?
Paulus skriv i Kol 3:12. De er Guds utvalde, heilage og kjære! Kle dykk då i inderleg medkjensle, godleik, audmjukskap, spaklynde og tolmod.
Av forkynnar Odd Dubland i følgjetongen "frå krånå mi" Dagen 27.09.2006
Ingen kommentarer:
Legg inn en kommentar